പഠനക്യാമ്പ് രസകരമായി

കളിയും കാര്യവുമായി പഠനക്യാമ്പ്

എസ്.എസ്.എല്‍.സി. പരീക്ഷയില്‍ വിജയശമാനം വര്‍ദ്ധിപ്പിക്കുക എന്ന ലക്ഷ്യത്തോടെ പാലക്കാട് ജില്ലാപഞ്ചായത്തും വിജയശ്രീ പദ്ധതിയും നല്‍കിയ മാര്‍ഗരേഖയുടെ അടിസ്ഥാനത്തില്‍ അടക്കാപുത്തൂര്‍ ശബരി പി.ടി.ബി.സ്മാരക ഹയര്‍സെക്കണ്ടറി സ്ക്കുളിലെ പത്താംക്ലാസിലെ തിരഞ്ഞെടുക്കപ്പെട്ട വിദ്യാര്‍ത്ഥികള്‍ക്കായി നടത്തിയ ചതുര്‍ദിന പഠനക്യാമ്പ് കുട്ടികളെ ആവേശഭരിതരാക്കിക്കൊണ്ട് പരിസമാപിച്ചു. രസതന്ത്രം, ഊര്‍ജതന്ത്രം, ഇംഗ്ലീഷ്, സാമൂഹ്യശാസ്ത്രം, ഗണിതം എന്നീ വിഷയങ്ങളില്‍ ക്ലാസ് മുറികളില്‍ നിന്നും വ്യത്യസ്ഥമായ ഒരു പഠന തന്ത്രമായിരുന്നു ക്യാമ്പില്‍ പരീക്ഷിച്ചത്. കുട്ടികളില്‍ ഏകാഗ്രത ഉളവാക്കാന്‍ ഉപകരിക്കുന്ന യോഗക്ലാസ് മുതല്‍ വിവിധതരത്തിലുള്ള കളികളും പഠനയാത്രയും സംഘടിപ്പിച്ചത് വിദ്യാര്‍ത്ഥികളില്‍ ആത്മവിശ്വാസം ഉളവാക്കുവാന്‍ സഹായകരമായി. പ്രശസ്ത തുയിലുണര്‍ത്ത് പാട്ട് കലാകാരി ശ്രീമതി കടമ്പൂര്‍ ശോഭനയും സംഘവും അവതിപ്പിച്ച തുയിലുണര്‍ത്ത് പാട്ടുകളും ശ്രീമതി ശാന്തകുമാരി അവതരിപ്പിച്ച പുള്ളുവന്‍ പാട്ടുകളും കുട്ടികളില്‍ കൗതുകമുണര്‍ത്തി. ക്യാമ്പിന്റെ സമാപനദിനത്തില്‍ കലാസാംസ്ക്കാരിക പരിപാടികളുടെ ഈറ്റില്ലമായ വെള്ളിനേഴി കലാഗ്രാമത്തിലെ ഒളപ്പമണ്ണ മനയിലേക്ക് നടത്തിയ പഠനയാത്രയും ശ്രീ കെ.കെ. വേണുഗോപാല്‍, ശ്രീ വെള്ളിനേഴി ഗോപിരാജ്, ശ്രീ രാജന്‍ മതിലകത്ത് എന്നിവരുടെ വിവരണങ്ങള്‍ കുട്ടികളെ അറിവിന്റെ അനുഭൂതിയിലേക്ക് നയിച്ചു. പ്രധാനാധ്യാപകന്‍ ശ്രീ കെ.ആര്‍ വേണുഗോപാല്‍ ക്യാമ്പിന്റെ ഉദ്ഘാടനം നിര്‍വ്വഹിച്ചു. പ്രിന്‍സിപ്പല്‍ ശ്രീ ടി. ഹരിദാസ്, പി.ടി.എ പ്രസിഡണ്ട് ശ്രീ ടി. ജയപ്രകാശ്, സ്ക്കൂള്‍ വിജയശ്രീ കോ ഓര്‍ഡിനേറ്റര്‍ ശ്രീ കെ. അജിത് , സ്ററാഫ് സെക്രട്ടറി ശ്രീ എം. പ്രശാന്ത് എന്നിവര്‍ സംസാരിച്ചു. ശ്രീ എം.ആര്‍ പ്രമോദ്, ശ്രീമതി എം. ആര്‍ മൃദുല, ശ്രീ .ഐ.ടി പ്രസാദ്, ശ്രീമതി സി. സുനന്ദ, ശ്രീമതി പി. വിദ്യ, ശ്രീമതി എന്‍ ജിഷ,ശ്രീമതി രത്നകുമാരി, ശ്രീമതി അഞ്ജന, ശ്രീമതി രോഷിനി, ശ്രീമതി പ്രതിഭ, ശ്രീമതി ബിന്ദു, ശ്രീമതി ജിനു, ശ്രീ വിഷ്ണുപ്രസാദ്.ടി. ശ്രീമതി അംബിക എന്നിവര്‍ ക്യാമ്പിന് നേതൃത്വം നല്‍കി.

പി.ടി.ഭാസ്ക്കരപ്പണിക്കര്‍ അനുസ്മരണവും ബാലപ്രതിഭ സംഗമവും നടത്തി

പി.ടി.ഭാസ്ക്കരപ്പണിക്കര്‍ അനുസ്മരണവും ബാലപ്രതിഭാ സംഗമവും നടത്തി

മലബാര്‍ ഡിസ്ട്രിക് ബോര്‍ഡ് ചെയര്‍മാനും ശാസ്ത്ര-സാമൂഹിക-വിദ്യാഭാസ മേഖലകളില്‍ നിറഞ്ഞ വ്യക്തിത്വവുമായിരുന്ന പി.ടി.ഭാസ്ക്കരപ്പണിക്കര്‌‍ കുട്ടികള്‍ക്കായി തുടങ്ങിവച്ച ശാസ്ത്ര പരീക്ഷയുടെ ജില്ലാ തല ബാലപ്രതിഭാസംഗമവും പി.ടി.ബി അനുസ്മരണവും അടക്കാപുത്തൂര്‍ ഹൈസ്ക്കൂള്‍ സ്മൃതി മന്ദിരത്തില്‍ നടത്തി. മുന്‍ ബാലപ്രതിഭയും യുവ കവിയത്രിയുമായിരുന്ന കുമാരി വിനീതയുടെ അകാലചരമത്തില്‍ അനുശോചനം രേഖപ്പേടുത്തിയാണ് ബാലസംഗമം ആരംഭിച്ചത്. പി.ടി.ഭാസ്ക്കരപ്പണിക്കര്‍ അനുസ്മരണസമിതിയുടെ പ്രസിഡണ്ട് ഇന്ത്യനൂര്‍ ഗോപിയുടെ അധ്യക്ഷതയില്‍ ചിറ്റൂര്‍ ഗവ.കോളേജ് ഭൂമിശാസ്ത്ര വിഭാഗം മേധാവി പ്രോഫ. കെ ജയരാജ് പ്രതിഭാസംഗമവം ഉദ്ഘാടനം നിര്‍വ്വഹിച്ചു. ശ്രീ എം ദാമോദരന്‍ നമ്പൂതിരി മാസ്റ്റര്‍, ശ്രീ എം. സി ഉണ്ണികൃഷ്ണണന്‍ എന്നിവര്‍ സംസാരിച്ചു. തൂടര്‍ന്ന് ബാലപ്രതിഭകള്‍ക്ക് പ്രശനോത്തരി, പ്രസംഗം , വിവരാന്വേഷണപുസ്തക പ്രദര്‍ശനം എന്നിവ നടത്തി.

ഉച്ചക്കുശേഷം നടത്തിയ പി.ടി.ബി. അനുസ്മരണയോഗത്തില്‍ മണ്ണാര്‍ക്കാട് ഡി.ഇ.ഒ ശ്രീ പി. നാരായണന്‍ മാസ്റ്റര്‍ മുഖ്യപ്രഭാഷണം നടത്തി. അടക്കാപുത്തുര്‍ സംസ്കൃതി പ്രവര്‍ത്തകനും ചെന്നൈ ലയണ്‍സ് ക്ലബ്ബിന്റെ ലൈഫ് ടൈം അച്ച്വീവ്മെന്‍റ് അവാര്‍ഡ് ജേതാവുമായ ശ്രീ രാജേഷ് അടക്കാപുത്തൂരിനു പി.ടി.ഭാസ്ക്കരപ്പണിക്കര്‍ അനുസ്മരണസമിതിയുടെ പുരസ്ക്കാരം സമിതി ചെയര്‍മാന്‍ ഇന്ത്യനൂര്‍ ഗോപിമാസ്റ്റര്‍ നല്‍കി അനുമോദിച്ചു. ജില്ലാതല ജേതാക്കള്‍ക്ക് പി.വി.മാധവന്‍മാസ്റ്റര്‍സ്മാരക ട്രോഫികള്‍ വിതരണം ചെയ്തു. പി.ടി.ഭാസ്ക്കരപ്പണിക്കര്‍ അനുസ്മരണസമിതി സെക്രട്ടറി കെ അജിത് സ്വാഗതവും പ്രധാനാധ്യാപകന്‍ കെ.ആര്‍ വേണുഗോപാലന്‍ നന്ദിയും പറഞ്ഞു.

മത്സരങ്ങളില്‍ ഭാമ എ പ്രകാശ് (ജി.വി.എച്ച്.എസ്.എസ് ചെര്‍പ്പുളശേരി), നസീബ അബ്ദുള്‍ അസീസ് (എം.എന്‍.കെ.എം. ജി.എച്ച്.എസ് .എസ്.പുലാപ്പറ്റ)ജയ്ദേവ്. എസ്.റാം(ജി.ബി.എച്ച്.എസ്. എസ്. നെന്മാറ),സ്വാതിഎസ്(ജി.എച്ച്.എസ്.എസ്.കടമ്പൂര്‍),നിധീഷ് നാരായണന്‍ എം.വി(എച്ച്.എസ്.എസ്. ശ്രീകൃഷ്ണപുരം),സാന്ദ്ര എസ്.ബി (ശബരി. എച്ച്.എസ്.എസ്.മണ്ണാര്‍ക്കാട്,പള്ളിക്കുറുപ്പ്)എന്നിവര്‍ വിവരശേഖരണ പുസ്തകത്തിലും നിരഞ്ജന ടി.കെ (എച്ച്.എസ്.എസ്. ശ്രീകൃഷ്ണപുരം),രോഹിത് ടി.പി(.ജി.എച്ച്.എസ്.എസ്.കടമ്പൂര്‍)എന്നിവര്‍ അന്വേഷണ പ്രോജക്ടിലും , ഹരിനന്ദരാജ്(ശബരി. എച്ച്.എസ്.എസ്.മണ്ണാര്‍ക്കാട് പള്ളിക്കുറുപ്പ്) നന്ദന മനോജ്(എച്ച്.എസ്.എസ്. വല്ലപ്പുഴ) എന്നിവര്‍ പ്രശ്നോത്തരിയിലും ജില്ലാതല വിജയികളായി. ഇവര്‍ക്ക് ഡിസംബര്‍ 30 നു എറാണാംകുളത്തു നടത്തുന്ന സംസ്ഥാനതല മത്സരങ്ങളില്‍ പങ്കെടുക്കാമെന്ന് ഭാരവാഹികള്‍ അറിയിച്ചു

അറബിക് കലാകിരീടം അടക്കാപുത്തുര്‍ ശബരി പി.ടി.ബി.എസ്.എച്ച്.എസ്.എസ് നിലനിര്‍ത്തി

ചെര്‍പ്പുളശേരി ഉപജില്ലാ സ്ക്കൂള്‍ കലോത്സവത്തിന്റെ ഭാഗമായി നടത്തിയ അറബിക് സാഹിത്യോത്സവത്തില്‍ അടക്കാപുത്തുര്‍ ശബരി പി.ടി.ബി.എസ്.എച്ച്.എസ്.എസ് നിലനിര്‍ത്തി.

മത്സരയിനങ്ങളില്‍ ആകെയുള്ള 19 ഇനങ്ങളില്‍ 17 ഇനങ്ങളിലും എ ഗ്രേഡ് കരസ്ഥമാക്കിയാണ് ഈ നേട്ടം കൈവരിച്ചത്. രണ്ടു വര്‍ഷങ്ങളില്‍ രണ്ടാം സ്ഥാനം ലഭിച്ചതൊഴികെ ബാക്കി പത്ത് വര്‍ഷങ്ങള്‍ തുടര്‍ച്ചയായി അടക്കാപുത്തുര്‍ ശബരി പി.ടി.ബി.എസ്.എച്ച്.എസ്.എസ് അറബിക് കലാകിരീടം കരസ്ഥമാക്കിയിരുന്നു. അറബിക് അധ്യാപകന്‍ ശ്രീ സി. മുഹിനുദ്ദീന്‍ മാസ്റ്ററുടെ പരിശീലനത്തിലൂടേയും മറ്റ് അധ്യാപക-അനധ്യാപകരുടേയും സ്ക്കൂള്‍ മാനേജമന്റ് പി.ടി. എ എന്നിവരുടെ പ്രോത്സാഹനവുമാണ് വിദ്യാലയത്തിന്റെ ഈ വിജയത്തിളക്കത്തിനു കാരണം.

എന്‍.സി.സി ദിനം ആചരിച്ചു.

അടക്കാപുത്തൂര്‍ ശബരി പി.ടി.ബി.എസ്.എച്ച്.എസി ലെ എന്‍.സി.സി യൂണിറ്റിന്റെ ആഭിമുഖ്യത്തില്‍ അറുപത്തിയാറാമത് എന്‍.സി.സി ദിനം ആചരിച്ചു. വിദ്യാലത്തില്‍ നിന്നും അടക്കാപുത്തൂര്‍ സെന്റര്‍ വരെ നടത്തിയ എന്‍.സി.സി കാഡറ്റുകളുടെ സന്ദേശറാലി സ്റ്റാഫ് സെക്രട്ടറിയും സീനിയര്‍ അധ്യാപകനുമായ ശ്രീ എം. പ്രശാന്ത് ഫ്ലാഗ്ഓഫ് ചെയ്തു. ചീഫ് ഓഫീസര്‍ എം. ആര്‍ പ്രമോദ് , സുബേദാര്‍ ശിവകുമാര്‍ , കെ. അജിത് എന്നിവര്‍ പങ്കെടുത്തു. പരിസരശുചീകരണം, പ്ലാസ്റ്റിക് നിര്‍മാര്‍ജനം തുടങ്ങിയ സേവന പ്രവര്‍ത്തനങ്ങള്‍ എന്‍.സി.സി ദിനാചരണത്തിന്റെ ഭാഗമായി കാഡറ്റുകള്‍ ഏറ്റെടുക്കുമെന്ന് പ്രതിജ്ഞയെടുത്തു.

പിറന്നാള്‍ മധുരത്തിനു പകരം പുസ്തക വിതരണം

 കൂട്ടുകാരുടെ പിറന്നാള്‍ ദിനത്തില്‍ മധുരം നല്‍കുന്നതിനു പകരം പുസ്തകവിതരണം ചെയ്തു വിദ്യാര്‍ത്ഥികള്‍ മാതൃകയായി. അടക്കാപുത്തൂര്‍ ശബരി പി.ടി.ബി. സ്മാരക ഹയര്‍ സെക്കണ്ടറി സ്ക്കൂളിലെ നല്ലപാഠം യൂണിറ്റിന്റെ ആഭിമുഖ്യത്തിലാണ് വ്യത്യസ്തമായ പദ്ധതിക്കു തുടക്കം കുറിച്ചത്. നന്മ യൂണിറ്റ് അംഗമായ പാര്‍വ്വതിയാണ് തന്റെ അമ്മയായ ശ്രീമതി വാണീദേവിയേയും കൂട്ടിവന്ന് പുസ്തകമില്ലാത്ത കൂട്ടികള്‍ക്ക് പുസ്തകങ്ങള്‍ നല്‍കിയത്. സ്ക്കൂള്‍ അസംബ്ലിയില്‍ സ്കൂള്‍ ലീഡര്‍ മുഹമ്മദ് സഫ് വാന്‍ പുസ്തകങ്ങള്‍ ഏറ്റു വാങ്ങി. ശ്രീ എം പ്രശാന്ത്, ശ്രീമതി എം കോമളവല്ലി,ശ്രീമതി വാണീദേവി, ശ്രീ കെ അജിത് അന്നിവര്‍ സംസാരിച്ചു. പിന്നീട്  കുട്ടികളും അധ്യാപകരും തങ്ങളുടെ പിറന്നാള്‍ പ്രമാണിച്ച് മറ്റുള്ളവര്‍ക്ക് മാതൃകയാകുന്ന ഇത്തരം പ്രവര്‍ത്തനങ്ങള്‍ ചെയ്യുമെന്ന് പ്രതിജ്ഞയെടുത്തു.വരും ദിവസങ്ങളില്‍ ധാരാളം പുസ്തകങ്ങള്‍ ശേഖരിച്ച് അര്‍ഹരായ കൂട്ടുകാര്‍ക്ക് നല്‍കി സഹായിക്കലാണ് നല്ലപാഠം യൂണിറ്റിന്റെ ലക്ഷ്യം.

 ജില്ലാ മത്സരങ്ങളില്‍ പങ്കെടുക്കുവാന്‍ അര്‍ഹത നേടിയവര്‍

ചെര്‍പ്പുളശേരി ഉപജില്ലാ കായികമേള, ഗണിതശാസ്ത്ര- സാമൂഹ്യശാസ്ത്ര-പ്രവര്‍ത്തിപരിചയമേളകളില്‍ ഒന്നും രണ്ടും  സ്ഥാനം കരസ്ഥമാക്കി ജില്ലാ മത്സരങ്ങളില്‍ പങ്കെടുക്കുവാന്‍ അര്‍ഹത നേടിയവര്‍ അധ്യാപകര്‍ പി.ടി.എ ഭാരവാഹികള്‍ ​എന്നിവര്‍ക്കൊപ്പം. സ്ക്കൂള്‍ അസംബ്ലിയില്‍ സമ്മാനങ്ങള്‍ വിതരണം ചെയ്ത.

 ആഭ്യ ന്തരവകുപ്പ് മന്ത്രി ശ്രീ രമേശ് ചെന്നിത്തല വിദ്യാര്‍ത്ഥികള്‍ക്കയച്ച കത്ത് ആഹ്ലാദപൂര്‍വ്വം സ്വീകരിച്ചു.

ബഹുമാനപ്പെട്ട ആഭ്യന്തരവകുപ്പ് മന്ത്രി ശ്രീ രമേശ് ചെന്നിത്തല നല്ലപാഠം യൂണിറ്റിന്റെ പ്രവര്‍ത്തനങ്ങള്‍ക്ക് പ്രേരണയും പ്രോത്സാഹനവും നല്‍കി എഴുതിയ കത്ത് പ്രധാനാധ്യാപകന്‍ ശ്രീ കെ.ആര്‍ വേണുഗോപാല്‍ സ്ക്കൂള്‍ അസംബ്ലിയില്‍ കുട്ടികളെ അറിയിക്കുകയും ശ്രീമതി കോമളവല്ലി ടീച്ചര്‍ കത്ത് വായിച്ചു കേള്‍പ്പിക്കുകയും ചെയ്തത് കുട്ടികള്‍ക്ക് വലിയ അംഗീകാരവും പ്രചോദനവുമായി. പഠനത്തിലും നമ്മള്‍ ഉയര്‍ന്ന നിലവാരം കൈവരിക്കണമെന്ന അധ്യാപകരുടെ ആഹ്വാനം കുട്ടികള്‍ ഉള്‍ക്കൊണ്ടു.ഭരണത്തിന്റെ  ഉന്നത തലങ്ങളില്‍ നിന്ന് ലഭിച്ച ഈ പ്രോത്സാഹനത്തെ ഏറെ വിലമതിക്കുന്നെന്ന് കുട്ടികള്‍ അറിയിച്ചു.

സാഹിത്യോത്സവത്തില്‍ വിജയത്തിളക്കം
അഭിനന്ദനങ്ങള്‍!!!

ചെര്‍പ്പുളശേരി ഉപജില്ലാ വിദ്യാരംഗം സാഹിത്യവേദിയുടെ ആഭിമുഖ്യത്തില്‍ 17-10-2014 നു വെള്ളിയാഴ്ച്ച അഴിയന്നൂര്‍ എ.യൂ.പി.സ്ക്കൂളില്‍ വെച്ച് നടത്തിയ സാഹിത്യോത്സവത്തില്‍ നമ്മുടെ വിദ്യാലയം തിളക്കമാര്‍ന്ന നേട്ടം കൈവരിച്ചു. സാഹിത്യക്വിസ്, നാടന്‍പാട്ട് എന്നീ ഇനങ്ങളില്‍ ഒന്നാംസ്ഥാനം നേടി ജില്ലാതല മത്സരത്തില്‍ പങ്കെടുക്കുവാന്‍ അര്‍ഹത നേടി.

സാഹിത്യക്വിസില്‍ രഹ്ന.പി, ശ്രുതി സി.പി എന്നിവരും, നാടന്‍പാട്ടില്‍ പാര്‍വ്വതി പി.എം, ശ്രുതി കെ, വൃന്ദ, വിനോദ്, ശബരീനാഥ് എന്നിവരാണ് വിജയികളായത്.

ലോക 'വൈറ്റ്കെയ്ന്‍ ' ദിനത്തില്‍ സ്നേഹസന്ദേശവുമായി നല്ലപാഠം കൂട്ടുകാരെത്തി..

ലോകവൈറ്റ്കെയ്ന്‍ ദിനത്തിന്റെ മഹത്വം ഉള്‍ക്കൊണ്ടുകൊണ്ട് ശബരി പി.ടി.ബി.സ്മാരക ഹയര്‍സെണ്ടറി സ്കുളിലെ നല്ലപാഠം യൂണിറ്റിന്റെ ആഭിമുഖ്യത്തില്‍ തോട്ടര ഹെല്ലന്‍ കെല്ലര്‍ സ്മാരക അന്ധവിദ്യാലയം സന്ദര്‍ശിച്ചു. അന്ധതയെ തോല്പിച്ച് വിവിധ വസ്തുക്കളുടെ നിര്‍മ്മാണത്തിലേര്‍പ്പെടുകയും കമ്പ്യൂട്ടര്‍ പഠനത്തില്‍ ശ്രദ്ധിക്കുകയും ചെയ്യുന്ന കുട്ടികള്‍ അതിഥികള്‍ക്ക് അത്ഭുതമായി. പ്രസ്തുത വിദ്യാര്‍ത്ഥികളുമായി കുറേനേരം ചിലവഴിക്കുവാനും ചങ്ങാത്തം കൂടാനും അവര്‍ സമയംകണ്ടെത്തി. ഹെല്ലന്‍ കെല്ലര്‍ സ്മാരക വിദ്യാലയത്തിലെ പ്രധാനാധ്യാപകന്‍ ശ്രീ ബിജു ആര്‍ ടി, അധ്യാപകരായ ശ്രീ കെ.ബാലസുബ്രഹ്മണ്യന്‍ , ശ്രീ സുരേഷ്. എന്നിവര്‍ നല്ലപാഠം കൂട്ടുകാരെ സ്വീകരിച്ചു. ലോക വൈറ്റ്കെയ്ന്‍ദിനത്തിന്റെ പ്രാധാന്യത്തെക്കുറിച്ചും വിദ്യാലയത്തിലെ പഠനരീതികളേക്കുറിച്ചും ഹെല്ലന്‍കെല്ലര്‍സ്മാരക വിദ്യാലയത്തിലെ സീനീയര്‍ ടീച്ചര്‍ ശ്രീമതി സി.ഐ. ഉഷ കുട്ടികള്‍ക്ക് വിശദീകരിച്ചു നല്‍കി. നല്ലപാഠം യൂണിറ്റ് കോ-ഓര്‍ഡിനേറ്റര്‍ ശ്രീമതി എം. കോമളവല്ലി, കെ. അജിത്. എം. ആര്‍ പ്രമോദ്, ശ്രീ എം.പി അനില്‍കുമാര്‍, ശ്രീമതി ശില്പ, നല്ലപാഠംസ്കൂള്‍ യൂണിറ്റ് പ്രസി. കുമാരി ആതിര, സ്ക്കൂള്‍ ലീഡര്‍ മുഹമ്മദ് സഫ് വാന്‍ എന്നിവര്‍ സ്നേഹ സന്ദര്‍ശനത്തിനു നേതൃത്വം നല്‍കി. പ്രമുഖ വിദ്യാഭ്യാസ-ശാസ്ത്ര-സാമൂഹ്യ പ്രവര്‍ത്തകനും ആദ്യ പ്രധാനാധ്യാപകനുമായിരുന്ന ശ്രീ പി.ടി.ഭാസ്ക്കരപ്പണിക്കരുടെ ജന്മദിനവും ലോകവൈറ്റ്കെയ്ന്‍ ദിനവുമായ ഒക്ടോബര്‍ 15നു തോട്ടര ഹെല്ലന്‍കെല്ലര്‍ സ്മാരക വിദ്യാലയത്തിലേക്ക് സൗഹൃദ സന്ദര്‍ശനം നടത്തിയ നല്ലപാഠം യൂണിറ്റ് പ്രവര്‍ത്തകര്‍ക്ക് പ്രധാനാധ്യാപകന്‍ ശ്രീ കെ. ആര്‍ വേണുഗോപാല്‍ ആശംസകളേകി.

കലാ-കായികമേള സമാപിച്ചു.

അടക്കാപുത്തൂര്‍ ശബരി.പി.ടി.ബി.സ്മാരക ഹയര്‍സെക്കണ്ടറി സ്കൂളിലെ ഈ വര്‍ഷത്തെ കലാ കായികമേളകള്‍ സമാപിച്ചു. ശ്രീകൃഷ്ണപുരം ബ്ലോക്ക് പഞ്ചായത്ത് പ്രസി. ശ്രീ കെ.സി രാമന്‍കുട്ടി മേളകള്‍ ഉദ്ഘാടനം ചെയ്തു. പി.ടി.എ പ്രസി. ശ്രീ ടി. ജയപ്രകാശ് അധ്യക്ഷത വഹിച്ചു. തൃക്കടീരി പഞ്ചായത്ത് മെംബര്‍ ശ്രീമതി ഖദീജ, പി.ടി.എ വൈസ്. പ്രസി. ശ്രീ കെ. ടി. മുരളീമോഹന്‍, പ്രിന്‍സിപ്പല്‍ ടി.ഹരിദാസ്, കായികാധ്യാപകന്‍ ശ്രീ എം. പി. അനില്‍കുമാര്‍, എന്നിവര്‍ സംസാരിച്ചു. വര്‍ണശഭളമായ മാര്‍ച്ച്പാസറ്റിനു ശേഷം കായിക താരങ്ങള്‍ക്ക് ശ്രീ കെ അജിത് പ്രതിഞ്ജ ചൊല്ലിക്കൊടുത്തു. സ്ക്കൂള്‍ വിദ്യാര്‍ത്ഥികള്‍ക്കു പറമെ പൂര്‍വ്വ വിദ്യാര്‍ത്ഥികളും കായികമത്സരങ്ങളില്‍ പങ്കെടുത്തു.പ്രധാനാധ്യാപകന്‍ ശ്രീ കെ. ആര്‍ വേണുഗോപാല്‍ സ്വാഗതവും അക്ഷയ് അജിത് നന്ദിയും പറഞ്ഞു.

സമാപന സമ്മേളനം വെള്ളിനേഴി പഞ്ചായത്ത് പ്രസി. ശ്രീമതി. സി. ജീ. ഗീത ഉദ്ഘാടനം ചെയ്ത് സമ്മാനങ്ങള്‍ വിതരണം ചെയ്തു. ശ്രീ എം. പ്രശാന്ത്, ശ്രീ എം. ആര്‍ പ്രമോദ്, ശ്രീ . സി. മുഹിനുദ്ദീന്‍, അഖില്‍ സി. ആര്‍ , എന്നിവര്‍ സംസാരിച്ചു. കായികതാരങ്ങള്‍ക്കുള്ള മെഡലുകള്‍ ശ്രീ പാലക്കാവില്‍ കൃഷ്ണന്‍ സംഭാവന ചെയ്തു.